In lookin back at aw Ah've seen
For nearly ninety year,
In diff'rent places Ah hae been
Wi diff'rent roads tae steer.
Ah'm gled that Ah hud cut ma teeth
An spent ma workin days,
Where Ah wis born in Sunny Leith
Wi independent ways.

For Leith an Scotland are as twins
As Scots whae've been betrayed
By some o their maist trustit yins
For foreign money paid.
Despite the votes frae Sunny Leith,
Westminster passin Bill
That undermined frae underneath,
Leith's independent still.

So in that toon where Ah wis born
An taught at local schuil,
Ah learn't the coats by Heid Yins worn
Were worn wi cunnin skill,
That trustin Leithers couldnae see
Hoo underneath the gear,
Intentions o thae Leaders be
Unlike the claes they wear.

An takin this tae modern days
An richt up tae this year,
Iraqui pains show Leaders' ways
Are hidden in sic gear.
For Tigers cannae chinge their stripes
Ner Jackals chinge their style.
As Leaders' hide, in media hypes,
It's for Iraqui ile.

Ah'll pray this year, as prayed afore,
The Christian speerit wins
The he'rts o them that gangs tae war,
Afore their war begins.
Because in aw thae years Ah've seen
The yins that pey the price,
Are innocents whae've never been
Allowed tae throw the dice.

22 September 2004