"SOMEWHERE in France" ; it is a' I
can get
Fae the billies that ken o my
loon ;
"Somewhere in France" ; gin they'd
only tell's far,
I wid pairt wi' my hinmost
half-croon.
"Somewhere in France" he is
fechtin' the day :
He is fechtin' for Britain an'
richt,
God wi' his conscience an' nervin'
his airm,
An' wi' hell in his hearin'
an' sicht.
"Somewhere in France" he is
thinkin' o' hame,
Fin the bullets an' shalls lat
him be,
Dreamin' o' Scotlan', an' seein'
the glen,
An' the hamestead, his fader,
an' me.
"Somewhere in France" I am dootin'
he'll fa',
For the oolet's been hootin'
owre near,
An' siccan a dream on Monanday
laist !
It waukent me sweatin' wi'
fear.
"Somewhere in France" I may seen
hae a grave -
It is a' that I'll get fae the
war ;
Mithers o' Scotlan' ! fat mair'll
be yours
Than a grave, an' a greet, an'
hert-scar?
"Somewhere in France" : oh, the
weary refrain !
An' it's naething like fat
mithers need :
"Somewhere" 's a mock fin we're
hung'rin' to ken
Far oor laddies are, livin' or
deid.
"Somewhere in France" : but they
winna bleck God,
For He sees far they've pitten
oor loons,
An' He'll bring thegither ilk
mither an' son
Fin the trumpet o' destiny
soun's.
