Freedom Come All Ye
by Hamish Henderson
Click here to listen
to this in Real Audio read by Marilyn Wright
Rauch the wind in
the clear day's dawnin',
Blaws the cloods heelster gowdie o'er the bay,
But there's mair than a rauch wind blawin'
Through the great glen o' the warl' today,
It's a thocht that wad gar oor rottens,
A' they rogues that gang gallus fresh and gay,
Tak the road and seek ither loanins,
For their ill ploys tae sport and play.
Nae mair will oor bonnie gallants
Gang tae war when the braggarts croosely craw.
Nor wee weans frae pitheid or clachan,
Mourn the ships sailin' frae the Broomielaw.
Broken families in lands we've harried,
Will curse Scotland the Brave nae mair, nae mair.
Black and white each till ither married,
Mak the vile barracks o' their masters bare.
Sae come all ye at hame wi' freedom.
Never heed whit the hoodies croak for doom.
In yer hoose a' the balms o' Adam
Can find breed, barley bree and painted room
When McLean meets wi' his freen's in Springburn
A' the roses and geans will turn tae bloom,
And the black boys beyont Nyanga
Ding the fell gallows of the burghers doon.
(Repeat the first four lines of the first verse)