Wee Freenly Doug
by W D Cocker
Read by Marilyn Wright
Click here to listen to this in
Wee freenly doug that rins aroon,
What cantrip's this? Get doon! Get doon!
I'm no yer maister. Hoots! gang hame!
I dinna ken ye, what's yer name?
I like the way ye cock yer lug,
Wee freenly doug.
I've clapped yer heid, noo rin awa',
What's that? Ye want to gie a paw!
Ay, dougs an' men, ma canine brither,
Are kind o' sib to ane anither,
Noo dinna bark, ye'll fricht that speug,
Ye randy doug.
Keep aff ma knees, ye daft wee loon,
Ye'll fyle ma claes! Keep doon! keep doon!
Buscuits? I've nane. I un'erstaun';
Ye only want to lick ma haun.
There, lick awa', I'm no' a fyke,
Wee freenly tyke.
Ye'll wag yer tail aff wi' guid-natur',
Puir thing, ye're no' a bad wee cratur',
Did ye jalouse ma he'rt was wae,
An' did ye mean to mak' me gay?
Ay! glower at me, an' cock yer lug,
Wee freenly doug!