Search just our sites by using our customised search engine
Unique Cottages | Electric Scotland's Classified Directory

Click here to get a Printer Friendly Page

A Song of Paradise
Isobel W Hutchison

Click here to listen to this in Real Audio read by Marilyn Wright

I'm an auld body, noo, an' dune,
No fit for muckle mair
Than juist tae sit an' mind the fire
An' watch the glory there
Burn doon an' gaither on the ribs
An' fa' into the pan,
An' aye I think it's like the spark
That's in the breist o' man.
The minister comes ben at whiles
An' talks tae me o' God.
He's a weel-meanin', canty lad,
An' yet I canna haud
Wi' a' he says. There's some that's gane
(The Lord forgie!) I tell
Ye I had liefer see again
Than even God Himsel'.
An' yet there's some I'm sweir tae think
I'll come across up there!
My guid-sister was ane o' these
(In spite o' a' her care!)
I aye keep hopin' (though it's wrang!),
If she's got slippin' ben,
They'll let me oot anither way
An' doon the stair again!
They say there's mony mansions there,
An' weel I hope it's meant,
I wadna like tae find masel'
Shut up  wi' a' I've kent!
I'm no for harps or golden croons,
I've tried tae dae my best,
An' syne I've trusted Paradise
Wad be a place o' rest.
Sae whiles at nicht I watch the fire
An' in the ashes fa'
I think I see the wee cot hoose
Where a' the bairns were sma'.
The water lippin' on the shore,
The kirk upon the rise -
I didna want a mansion, Lord,
Wi' that for Paradise.

Return to Poetry/Quotes/Stories


This comment system requires you to be logged in through either a Disqus account or an account you already have with Google, Twitter, Facebook or Yahoo. In the event you don't have an account with any of these companies then you can create an account with Disqus. All comments are moderated so they won't display until the moderator has approved your comment.

comments powered by Disqus