Oh, weel yet div I min' on't

In days lang, lang gane bye,

The dear aul' ramblin' gairden

Sae clear in memory's eye;

There a' jist mixter-maxter

The sweet aul' favourites grew,

The roses an' the aul' maids' pride,

Rosemary, thyme an' rue.

 

The honeysuckle clim't the wa',

An' aye at early morn

A guff o' sweetness creepit in

Tae tell o' day new-born;

An' through it a' was marjoram,

Fite bells an' mappie-moo,

An' mony ithers dear tae me

O' ilka shade an' hue.

 

Anaith the thrawn aul' aipple tree

The aul' fowk aft wad sit,

An' grandad there wad smoke an' dream,

An' granny eest tae knit;

They were pairt o' that aul' gairden,

An' tho' lang since awa'

They linger fondly in my he'rt,

The best lo'ed o' them a'.