First comes the kirn-feast,
Neist Halloween.
I got mysel a muckle neep
Frae Fermer Broun yestreen.
I'll hollow oot the inside,
Mak flegsome een and mou,
Put in a lichit caunle
To gie them aa a grue.
We're ready noo for guisin
And aa the friendly folk
Gie aipples, nits, and siller
To fill the guiser's poke.
We'll feenish up at my hoose
Doukin in a byne
And eatin champit tatties
Like auld lang syne.
