In New Deer parish I was born,
A child o' youth to Methlick came,
An' gin ye'll no believe a word,
The session clerk will tell the same.
Linten adie, toorin adie,
Linten adie, toorin ae,
Linten lourin, lourin, lourin,
Linten lourin,lourin lee.
Good education I did get,
And I did learn to read and write,
My parents they were proud o' me,
My mother in me took delight.
To bide upon my faither's fairm,
That was never my intent,
I lo'ed the lasses double weel,
And aye the weary drap to drink.
As I cam' in by Netherdale,
At Turra market for to fee,
I fell in wi' a fairmer chiel,
Frae the Barnyards o' Delgaty.
He promised me the ae best pair
I ever set my e'en upon,
When I gaed hame to barnyards,
There was naething there but skin and bone.
The auld black horse sat on his rump,
The auld white meer lay on her wime,
And a' that I could hup and crack,
They wadna rise at yokin' time.
Meg MacPherson mak's my brose,
An' her an' me canna 'gree,
First a mote and then a knot
And aye the ither jilp o' bree.
When I go to the Kirk on Sunday,
Mony's the bonnie lassie I see,
Prim, sittin' by her daddy's side,
And winkin' ower the pews at me.
I can drink an' nae be drunk,
I can fight an' nae be slain,
I can court anither's lass,
An' aye be welcome to my ain.
My can'le noo it is brunt oot,
The snotter's fairly on the wane,
Sae fare ye weel, ye Barnyards,
Ye'll never catch me here again.