THE RANTIN DOG, THE DADDIE O'T
Robert Burns

O, wha my babie-clouts will buy?
O, wha will tent me when I cry?
Wha will kiss me where I lie? -
The rantin dog, the daddie o't!

O, wha will own he did the faut?
O, wha will buy the groanin maut?
O, wha will tell me how to ca't? -
The rantin dog, the daddie o't!

When I mount the creepie-chair,
Wha will sit beside me there?
Gie me Rob, I'll seek nae mair -
The rantin dog, the daddie o't!

Wha will crack to me my lane?
Wha will mak me fidgin fain?
Wha will kiss me o'er again? -
The rantin dog, the daddie o't!

Footnote: Our National Bard wrote of this song - "I composed this song pretty early in life and sent it to a young girl, a very particular acquaintance of mine, who was at that time under a cloud."  The girl referred to was his 'bonnie Bettie' - Elizabeth Paton, a servant at Lochlie, who was carrying the poet's child.  Named after her mother 'Dear-bought Bess' was acknowledged by Burns as his daughter and was raised by his mother.