Kerseckies

[Woollen cardigans with buttons and pockets]

Lyrics re-composed by John Henderson on the 21st of August, 2011,
to Ernest R. Ball's 1920 music for the song, 'Saloon'.

Aft I'm myndin fan we wur thegither,
Aa the coontless doric wirds Aunt Neta spak;
She wid eese the likes o stechies, e'en mair kerious ... kerseckies,
An aft sich as thon nae heid nor tail I'd mak;
Sae she'd ging an draa wird picturs o them fur me,
An I seen wud oonerstan wi'oot mair speel;
Bit tae mak richt shair ma meesical Aunt Neta
Wud neist croon a sang tae kent teens affa weel ....

"Auld Erchie - he aye weert - kerseckies .... och ay!
Sic waarm - waistcoats o woo - wi lang sleeves - syne an aa,
Haen twa - eesefu pooches - oan ilk sid doon on the front
Faar sax buttons wud haud ticht tae kep oot the cauld;
Ye wud ken Erchie's jynts hidnae 'neugh ile,
Sae he shauchl'd an stacher'd aa the fyle;
Bit nae maitter his slaa meevin,
He thenked Gweed 'at he'd been gien,
Kerseckies, Kerseckies, Kerseckies."

Aft I'm myndin fan we wur thegither,
Coontless doric wirds Aunt Neta spak;
She wid eese the likes o stechies, e'en mair kerious ... kerseckies,
An aft sich as thon nae heid nor tail I'd mak;
Sae she'd ging an draa wird picturs o them fur me,
An I seen wud oonerstan wi'oot mair speel;
Bit tae mak richt shair ma meesical Aunt Neta
Wud neist croon a sang tae kent teens affa weel ....

"Like Erchie - yir Granda - weert kerseckies ... och ay!
Thase wur waarm - waistcoats o woo - wi lang sleeves - syne an aa,
An they cairrit - pooches nait - oan ilk sid on the front
Far sax buttons wud haud ticht tae kep oot the cauld;
Noo yir Granda wis nae short o jynt ile,
An he wud uprichtly wauk mile efter mile;
Him aye kennin he'd bide bein,
Fur yir Grandma'd him hid gien,
Kerseckies, Kerseckies, Kerseckies."