(The Small House
On Its Own)
A poem by John Henderson composed on the 16th of September,
The wee hoose oan its lane leuk'd sae dool
Nar the side o a weel girssit ley;
For nae lum steed up prood oan its reef,
An its wa's wur aa fair barkit grey.
The sclait-reef oan its tap leuk'd spleet new
Wi guid reyn-gutters siccar aa roon,
Bit nae gless shawed up in its windae
Fyle its door hid a bore cut laich doon.
Gin yon wa's hid a vyce fur tae spik,
Fu mony a story they cud spoot;
For maist wa's hiv sherp een an lugs,
An elephants' mem'ries tae boot.
Mebbe fuspers o jos fa aft fun
Thon quait neuk jist graun for thur trysts;
Anse lang syne peer auld cottar-fowks
Fa'd coont the baw-bees in thur kists.