Check all the Clans that have DNA Projects. If your Clan is not in the list there's a way for it to be listed. Electric Scotland's Classified Directory An amazing collection of unique holiday cottages, castles and apartments, all over Scotland in truly amazing locations.

The Icy Skip


[The Icy Slide]

Lyrics composed by John Henderson on the 11th of September, 2009
to the music of J. Lawrence Cook's 'Ragtime Melody';
and based loosely on WD Cocker's poem 'The Slide' [see below]


Wins blaa'd snell an howdery, the grup o freest wis keen,
An the auld man wis carnapti-ous, tae jeedge him by his een;
Ma lugs maun hiv begeckit me or I wid hiv said thit he swore
Fur oor bairns hid screeved a gey icy skip thit ran oan-doon by oor frint door.

The auld man hid left his ingle waarm to tak a wee bit dauner oot wast,
Fur tae see hoo aa his hens an deuks micht be surveevin in the cauld blast;
He took yae step an seen skytit aff, syne let oot an affa-lik roar
Whaur oor bairns they'd ..... screeved a skip richt aside thur ain an his frint door.

Awa he slid sae daftie-like whiles he lost his stauff an hat,
Syne he tummlet ower his wilkies lik some gytie acrobat;
The bairns begued sherp-lik skirls an skraichs fur they thocht it sich a splore—
Bit hoo daur they mak a fell icy skip richt fornenst o' his frint door?

The auld man stapped aa thur cantrippin, fur he thowed thur slide wi saut:
Gin the bairnies gat sair paiks thit nicht syne it widna be his faut.
Bit callans wull be callans, an I’ve telt him thon afore-—
Fur lang syne he bigg'd a skip himsel fornenst his pa's frint door!

**********************************************************************************

THE SLIDE
by WD Cocker in 1949

The win’ is snell an' nirlin’, the frost is fell an’ keen,
The auld man’s gey carnaptions, ye’ll see it in his een;
My lugs he shairly failed me or I would say he swore—
The bairns hae made a slippy slide fornenst oor door.

The auld man left the ingle to tak’ a dauner wast,
To see hoo hens an’ sic like were farin’ in the blast;
He took yae step an' skytit, then set up sic a roar-
The bairns had made a slippy slide fornenst oor door.

Awa’ he slid sae daft-like, he lost his stauff an’ hat,
Then tummlet ower his wilkies like some auld acrobat;
The bairns begued the skirlin’, they thocht it sic a splore—
Hoo daur they mak’ a slippy slide fornenst oor door?

The auld man stopped their cantrips, he thowed the slide wi’ saut:
Gin bairnies get nae paiks the nicht it winna be his faut.
But callans will be callans, I’ve telt him that afore—
Lang syne he made a slide himsel’ fornenst oor door,


Return to John's Poetry Page



Popular Pages



More Info

Click here to get a Printer Friendly Page